Regionalraad för Oostfreesland kummt tosamen
Vandag is dat sowiet. De neje Regionalraad för Oostfreesland kummt to't eerste Maal binanner. Mit disse Versammeln, wat en bietje sowat wesen sall as en "Oostfresenparlament", sall dat Tosamenwark in de Streek Oostfreesland utboot worden. Ok na buten will Oostfreesland so mehr Gellen hebben. Dat bünd 53 Lüü ut de Landkreisen Auerk, Leer un Wittmund un de Stadt Emden, de daar binnen dat Versammeln sitten. Man wi van d' Böskupp löven neet so recht, dat bi dat hele Wark an't Enn wat van Belang ruutkomen deit, umdat de een of anner hoge Verwaltensminsk in de Kuntrei kien Sinn för en beter Tosamenhollen in Oostfreesland hett. Man wi wassen seker blied, wenn wi bi disse Menen up de verkehrde Kant sitten. Hopen wi't Best!
Kommentar? 25. Aug 2010 |
|
Butenoostfresendag an d' 29. un 30. Mai
Ok dit Jahr gift dat weer en Dag för de Butenoostfresen. An d' 29. un 30. van d' Mai-Maant komen de Oostfresen van buten Oostfreesland in Wittmund tosamen. Well mehr weten un sük vlicht ok anmellen will, kann mit Almut Heibült van d' AG Butenoostfresen Noord proten:a.heibuelt@hfk-bremen.de
Kommentar? 03. Mai 2010 |
|
Jung Lüü in d' Vörstand van Oostfreeske Taal
Leez. Jung Minsken stunnen heel in d' Middent van de tiwntigste Hoovdversammeln van de Vereen för oostfreeske Spraak un Kultur "Oostfreeske Taal". Mit Antje Olthoff (Loog), Antje Swyter (Mainhasf) un Temmo Bosse (Leer) bünd dree jung Plattdütskfrünnen as Bisitters in de Vörstand wählt worden.
Kommentar? 12. Mar 2010 |
|
Interfreesk Kongress in Oostfreesland
Dit Jahr gift dat weer en Interfreesk Kongress un de word utricht van de Sektion Oost van d' Interfreeske Raad. Dat hele wark sall in Leer van d' 12. bit 14. Juni-Maant togang komen. Thema is "Tidenwessel". Wenn ji mehr weten of gliek anmellen willen, denn kiekt up de Webstee van de Interfreeske Raad..
Kommentar? 04. Mai 2009 |
|
Freeske Freedom an de Autobahn
 An d' Autobahnen in Oostfreesland gift dat in Tokunfst groot Schillers, waar up wiest word, dat dat in uns Kuntrei de Tradition van de Freeske Freedom gift. Up Bedrieven van de Oostfreeske Landskupp worden al dit Jahr Schillers bi de A28 bi de Utfahrt Filsum upstellt. Later gift dat denn ok weffe an de A31 bi Riep.
mehr.../Kommentar? 28. Feb 2009 |
|
"Oostfreesland" is heel good
De Artikel over Oostfreesland in de dütske Wikipedia is nu as en besünners goden Artikel uttekent worden. De Indrag in de List van de "exzellent Artikels" kummt döör de Wark van en Koppel van Schrievers, de al siet'n lang Tied mit Bliedskupp un Fliet hör Wark an Artikels over oostfreeske Saken un Belangen doon. De Böskupp van Oostfreesland graleert un wünskt ok för de Tokunfst, dat dat good wiedergeiht. Man ok wat al good is, kann noch beter worden. Daarum ropen wi daarto up, dat elkeen bi de freje Enzyklopädie mitmaken deit un sien Deel to dat Vebertern van de Artikels togifft.
Kommentar? 30. Nov 2008 |
|
Umfraag to d' Fresenpartei
Nett twee Jahr, nadem de Böskupp van Oostfreesland en Umfraag harr, of Oostfreesland en egen Partei bruukt, hett de Oostfresen-Zeitung in Leer hör Lesers ok fragt. De Fraag up de Internetsiden van dat Bladdje was mit "Brauchen die Ostfriesen eine eigene Partei" bold liek as do bi de Böskupp, man dat gaff bi d' OZ daar kien Mögelkheid "Egal" uttowählen. Dat Bladd harr bold dübbelt so mennig Deelnahmers, man dat Ergeevnis was bold liek: Ruugweg 80 Perzent van de Lüü, de daar mitmaakt hebben, menen van süks'n Partei, dat dat good was.
Kommentar? 21. Nov 2008 |
