Klootscheten

“Nachdem des die Erfahrung bezeuget, daß bey dem sogenannten Klohtschießen, das um Geld, Bier oder andere Getränke angestellt wird, oder auch wozu die Nachbarschaften, ja wol gantze Gemeinen und Dörffer sich gegen einander ausfordern und aufbiehten, vielerley Unordnungen mit Saufen, Fressen, Schelten, greulichen Fluchen und schweren Schlagen und Verwunden und anderen groben Aergernis frommer Leute… “

(Ut de Begrünnen för dat Verbodd van’t Klootscheten dör Fürst Georg Albrecht, 1731)

Dat Klootscheten van de Fresen wurr in’t 19. Jahrhunnert dat eerste Maal beleggt, man dat gellt as seker, dat sien Historje mennig wat wieder torügg geiht. Lüü vertellen, dat de “Kloot” (“Kluut”) ut brannd Klei toeerst en Waap för dat Verdeffenderen was. Al de röömske Schriever Tacitus sall vertellt hebben, dat de Fresen mit sükse Kluten van sünnbrannd Klei hör Feenden ut dat Land dreven.
Later kwam daar en Spoort bi ruut, waar umto mennig maal weddt, drunken un fiert wurr. Dat wurr so leep, dat dat Klootscheten (nettso as dat Boßeln) verseggt wurr. Man dat is neet so, dat sük de Fresen van so en Verbodd offhollen leten…

Vandag besteiht de Kloot ut en Kugel ut Bokenholt, waar van dree Sieden ut over krüüz Gatten indrillt worden un Lood infüllt word. Dat hele Wark is van 58 mm Dickde un weegt good wat’n Pund. 
Klootscheten word van neet so vööl Minsken maakt as Boßeln, denn dat is good wat stuurder. Man nett daarum hebben de Klootscheters en hoge Ansehen bi de Oostfresen. Dat bruukt sien Tied, bit man de Technik för dat rechte Smieten van de Kloot lehrt hett:

Achter en Anloop van 25 Meters folgt dat kumplizeert Tosamenwark van d’ Bewegen van de Benen un Armen. De Klootscheter springt up en Ramp, ritt de Smiet-Arm wied na Achtern un schett de Kloot dör en bold 360° wied Bewegen van unnern na vörn. Daarbi leggt he de hele Wucht van sien Sprung in dat Smieten.

Good Klootscheters smieten de Kloot heel wied. De Oostfrees Geerd Geerdes hett 1935 mit 101,50 Meters en Rekoord för de Geschichtsboken upstellt. Eerst 1995 was een beter. Vandag liggt de Rekoord bi 106,20 Meters. De wurr upstellt an d’ 30. Junimaant 1996 van Stefan Albarus ut Nörden in Oostfreesland.