Vörschriften för d’ Inreis

Besünners in de Urlaubstied fragen uns de Lüü alltied weer, of dat besünner Regels gift , wenn een na Oostfreesland inreisen will. Mennig Minsken willen weten, of se een Verlöövschien (Visum) bruken. Faken willen se denn ok futt en van uns hebben. Wi bünd blied, dat dat noch Minsken gift, de sük up hör Urlaubsreis vörbereiden un elke Mögelkheid offdecken willen, besünners, wenn se hör Ferien in dat moie Oostfreesland verbrengen willen.
Man wi bruken daar neet groot umto proten: En Vis of sowat bruken ji neet. Oostfreesland is Lidd van de Europäiske Union (EU) un wenn dat denn maal in Freeistaat Oostfreesland geven sall, denn sall dat Land ok wall to d’ EU hören. So kummt dat, dat bi d’ Inreis normalerwies de Personaalutwies van en EU-Staat utrieken deit. Beter is blot noch de Utwies van Oostfreesland, (hier to beandragen). Unner uns: Kuntrulleert word kien een an de Butengrenzen van Oostfreesland.